“Parchì Corsica Libera ?” Da Saveriu Valentini

So’ di a generazioni chì hà vistu nascia ‘ssu muvimentu puliticu. 
Quandu eru ziteddu, Fighjulavu i me ghjenti, i me paisani. In i so gesti, in i so sguardi, circàiu ciò chì pudarria custruvì u me avvena. Mà eddi, erani scunvinti chì, l’avvena, ùn passaia micca par eddi. 
L’aviani dittu ch’eddi ùn asistiani micca, ch’eddi ùn erani nudda, o pocu affari. Hè par quissa ch’eddi ùn erani micca in i libra di scola. 
Allora, i so valori, l’aviani sminticati, persi, piattati, l’aviani ghjitati.L’aviani cambiati pa’ cincenni in formiccà. A paccutiglia.  
Ùn li firmàiani chè i so firiti, ‘ssa vrgogna qu’eddi piattàiani à u mondu. Fanon, ùn avia ancu scrittu nudda par eddi.  
Ma ùn ghjornu, i so figlioli ani imparatu. Si ni sò avvisti ch’eddi campàiani in bordu di praccipiziu. Uni pochì si sò alzati è ani briunatu. Ani briunatu forti ch’eddi asistiani. À i so’ parenti, chì ùn ci cridiani, l’ani dittu ch’eddi aviani un paesi, ch’eddi erani un populu, ch’eddi aviani una lingua, una cultura, com’à tutti. L’ani dittu ch’eddi vuliani assumiglià si à eddi, ch’eddi vuliani cuntinuà a storia, a so’ storia.  
Li ci hè vulsutu à scunvincia, metta i mani in u lozzu, bata si, bulicà in a nostra mimoria, in i nostri dulori, appicicà si à a muntagna. A nostra muntagna. Li ci hè vulsutu appuntiddà la di i so’ sonii, di a so’ scimughina, di a so’ ghjuventù, di a so vita. 
È sicura, ani fattu sbagli, sicura ani fattu u peghju. Sicura.  
Ani dubittatu, intrampulatu tantu è più in i trapuli di l’ordini, mà ani fattu, chì quissa , a morti, ùn l’accitàiani micca. 
 
Allora, si sò missi à cantà. I so canti tarrazzozi ani invaitu u nostru essa, ani sfraitu a bughjura. 
L’àiani trovi quì, sottu à i petri, in u pocu chì firmaia d’eddi stessi. 
 
Ani cercu, invintatu, ani creatu. Ani dittu, ad alta voci, ch’eddi erani vivi, ch’eddi ùn vuliani micca creda chì dumani ùn ci sia orisonti. Ùn pudiani creda chè du sia una fini, chè no’ ùn sia mi più chè picculi clienti di Auchan.  
Chè no ùn sia mi più nudda.  
Ani dittu chì ‘ssa storia, a notra storia, ùn si pò spingna cusì, chè u nostru populu, ‘ssu piculu populu, vechju quant’è u mondu, ùn devi micca spariscia, ani dittu qu’eddu vulia campà, quì, à mezzu Maritarraniu, in ‘ssu vrombu di Roma, di Greccia è di Egipta antica.  
Ani dittu ch’eddu ci vulia, par quissa, salvà a nostra lingua è a nostra cultura, ciò chì faci u nostru essa, ciò chè no semu, ciò chì ci lea à i nostri, à u nostru locu, ciò chì ci lèia à u tempu, à seculi di storia. Salvà ciò chè no emu in cumunu, salvà a notra carri. 
Eccu ciò ch’eiu ritengu di ‘ssi cinquanta anni di lotta naziunalista. 
Tutta a me vita, s’idea, m’avarà fattu tena rittu. 
Cinquant anni chè ‘ssu currenti puliticu di Corsica Libera à purtatu impesu impesu. Ni hè statu, par mè, u mutori cintrali, senza nissuni calculi, senza piani di carriera, senza cèrca di voci, solu u sagrifiziu, un donu di sè chì ùn asisti chè in i foli è l’ippupei. 
Oghji, in ‘ssu mondu chè no campemu, cusì incertu,  
di pettu à a sciappatura succiali, chì hè palpevuli,  
à ‘ssa sciappatura culturali immenza,  
a minaccia di sparizioni di u notru populu,  
di pettu à tutti i piriculi,  
 
Corsica Libera hè è firmarà par me, a cuscenza pulitica, nicissaria, indispinsevuli, par ch’eddu campi u nostru populu, è eddu a sà, chì a Corsica ùn hè da venda.